اس حقیقت کو نہیں بھولنا چاہیے کہ ہم اپنے اندر بہت سی کمزوریاں اور قابل اصلاح کوتاہیاں رکھتے ہیں اور ان کی اصلاح کی سچی فکر ہمیں ہونی چاہیے۔ نفس کو اس کا موقع دینا چاہیے نہ شیطان کو کہ وہ ہمیں اپنے حال پر مطمئن رکھنے میں کامیاب ہوجائے۔ اپنے حال میں مست رہنا اور اصلاح کی فکر سے خالی اور اس سے بے نیاز ہونا وہ بگاڑ ہے جس نے افراد تو افراد اقوام تک کو تباہ و برباد کردیا ہے اور جس پر قرآن شاہد ہے۔ تو ہمیں اپنی کوتاہیوں کی تاویل کرنی چاہیے نہ فکرِ اصلاح سے خالی اور بے نیاز اور سعی اصلاح سے غافل ہونا چاہیے۔ اپنے آپ پر احتساب و جائزہ کی نظر رکھتے ہوئے خیر خواہوں اور دوستوں کی نصیحتوں اور مشوروں پر پوری توجہ دیتے ہوئے اپنے مولا سے عفو و کرم کی بھیک مانگتے اور توفیقِ اصلاح چاہتے ہوئے رضائے رب کی راہ پر جاگتے شعور، بیدار قلب اور احتیاط و عزم کے ساتھ قدم بڑھاتے ہوئے جانا چاہیے۔ سچی بات یہ ہے کہ مدعیانِ اصلاح کے لیے سب سے کٹھن کام خود اپنی اصلاح کا کام ہے۔ مصلحین کے لیے سب سے بڑی آفت زعمِ اصلاح اور غرورِ اصلاح ہوتی ہے۔ چنانچہ یہ بات مشاہدے میں آتی رہتی ہے کہ ان مصلحین کے سامنے کوئی کتنے ہی خلوص اور درد مندی کے ساتھ ان کی کسی کوتاہی کو بہت ہی ہلکا کرکے اصلاح کی طرف متوجہ نہیں بلکہ درخواست اور گذارش کرتا ہے تو وہ آتش زیرپا ہوجاتے ہیں۔ توعرض کرنا یہ ہے کہ ابھی ہمارے قلوب اتنے فراخ اور اتنے مجلّی و مصفّی نہیں ہوئے ہیں کہ باہمی پر خلوص تنقید و اصلاح کے نتیجے میں بقول آپ کے اخلاص میں کوئی کمی اور سینے میں کوئی کینہ و کدورت کی پرچھائیں نظر نہ آتی ہو۔ واقعہ یہ ہے کہ ابھی یہ سب کچھ ہمارے اندر ہے اور باہمی تعلقات بھی اس سے متاثر ہوتے رہتے ہیں اور شکوےو شکایات کے دفتر بھی کھلتے رہتے ہیں۔ ہاں ہونا یہ چاہئےکہ ایسا نہ ہونے پائے اور جو کچھ ہونا چاہئے یہ بس خواہش سے مل نہیں جائے گا بلکہ اس کے لیے سخت ریاض اور محنت و توجہ کے ساتھ لگا تار سعی اصلاح کی ضرورت ہے۔ ہاں کوئی اس ضرورت کو محسوس کرنے لگے اور اس راہ پر پڑجائے تو یہ بات بھی کسی حد تک اطمینان کے لیے کافی ہے اور اس کی ضمانت بھی کہ مقصود حاصل ہوجائے گا۔ ان شاء اللہ۔
(یہ ایک خط کا اقتباس ہے جو سابق امیر جماعت اسلامی ہند مولانا سراج الحسن صاحبؒ (اس وقت امیر حلقہ) نے ایمرجنسی کے دوران سنٹرل جیل گلبرگہ سے ناظم ڈویژن بنگلور مولانا عبدالمجید صاحبؒ کے نام لکھا تھا۔ بحوالہ حجاب ڈائجسٹ، اکتوبر ۱۹۷۷)
